Bi istorio arrakastatsu Sidalavaren eta Reincorporaren ondoan

Incorpora Sidalava erakundeko profesionalen eskutik ezagutuko dugu, zailtasunak zailtasun, Reincorpora programaren bitartez nola jakin duten askatasunik gabeko pertsonen ondoan egoten. Gainera, eta etengabeko ahalegin horren adibide gisa, arrakasta itxaropentsua izan duten bi kasutan murgildu gara. Protagonistek enplegua aurkitu dute euren gizarteratze prozesuaren barruan.

Gure burua berriro asmatzea kolektibo ahulen beharrei erantzuteko

“Iaz, bizitzea egokitu zitzaigun egoera berrira egokitzeko gaitasun azkarra izan behar izan bagenuen, 2021ean borrokan jarraituko dugu”, azaldu dute Incorpora Euskadi Taldeko erakundea den Sidalavako profesionalek Gasteizen.

Erabiltzaileen behar berriei aurre egiteko, askatasunik gabe dauden pertsona askok espetxe batetik igaro ondoren indartu behar duten alderdi garrantzitsu bat bultzatu dute: “Autoestimua”, argitu dute, eta honakoa gaineratu dute: “Reincorpora programatik igarotzen diren pertsonen zailtasunez jabetzen gara, baina harrituta jarraitzen dugu haien erantzun positiboarekin eta aurrera egitea lortzeko eta bidean zailtasun asko aurkitu arren amore ez emateko duten motibazioarekin”.

Halaber, hau esan dute: “Haien inplikazioa eta gogoa lortzen dituzten arrakasten sinonimoak dira”. Izan ere, erakundeko profesionalek azaldu dutenez, “La Caixa” Fundazioaren ekimenetik igarotzen diren lau pertsonatik hiruk laneratzeko eta gizarteratzeko helburua lortzen dute, gizabanako bakoitzaren beharretara egokitzen den metodo malgu eta erabat pertsonalizatuari esker.

Reincorpora programa “La Caixa” Fundazioak finantzatutako ekimena da, eta Barne Ministerioarekin lankidetzan gauzatu da, Trabajo Penitenciario y Formación para el  Empleo izeneko Estatuko Erakundearen bitartez, kartzelan dauden pertsonei gizarteratzeko eta laneratzeko ibilbideak errazteko.

Helburu bera duten bi istorio desberdin: gizarteratzea eta laneratzea

Erakundearen gizarteratze-programaren barruan arreta jaso duten erabiltzaile askoren artean, bertako profesionalek bi kasu aipatu dizkigute bereziki, eta kasu horiek adibide ona dira ikusteko gainditzeko grina eta bizitza hobe baten aldeko determinazioa ezinbesteko osagaiak direla gizarteratzea eta laneratzea lortzeko.

Alde batetik, E.G ezagutu dugu, substantziak kontsumitzeagatik berriro gaixotu ondoren bere bizitza bideratzea erabaki zuen Reincorporako erabiltzaile ohi bat. Hala, espetxetik irten ostean, enplegua bilatzeko prozesuari berriro ekiten lagundu zioten Sidalavatik. “Bere beldur guztiak gainditzea eta bizitza normalizatua lortzeko motibazio eta inplikazio hori berriz izatea lortu zuen”, laburbildu dute Reincorporeko profesionalek.

Bere aldetik, erreferentziazko teknikariekin izandako elkarrizketa batean, erabiltzaileak gizarteratze proiektuan egin duen aldaketa aitortu du: “Oso argi daukat zer nahi dudan eta non egon nahi ez dudan; horregatik, borroka egingo dut, eta badakit Sidalavaren laguntzarekin lor dezakedala”.

E.G-ren ibilbide osotik, berarekin egon diren teknikariek haren gogoa eta interesa nabarmendu dituzte, eta jarrera horri esker lan-kontratu bat lortu du Gasteizko industria-sektoreko enpresa handi batean. “Lan-aukera horrek denboran irauten du, eta denbora luzez hala jarraitzeko itxaropena du. Gainera, E.G eta enpresa oso harro daude elkarlan horrekin eta oso balorazio positiboa egiten dute laneratzearen ondoren”, zehaztu dute.

Gaur hizpide dugun beste protagonista I.M. da, lan-esperientzia urria zuen 50 urteko emakume bat; izan ere, helduaroko bizitza gehiena espetxean igaro du, askatasunik gabe. Aurreko istorioan bezala, motibazioak, ekimenak eta erabakitasunak inflexio-puntua ezarri dute gizarteratzeko eta laneratzeko orduan. “Ahalegin jarraituaren ondorioz, I.M-k bi lan-aukera lortu ditu, eta horietan kontratatu dute. Biekin jarraitzen du, eta luzaroan jarraitzeko itxaropenarekin”.

Reincorpora programa, lan bat baino askoz gehiago

Reincorporako teknikariek espetxeko profesionalekin batera espetxean hasi zuten lanak jarraipena du erabiltzaileak askatasuna lortzen duenean. Izan ere, Reincorpora programako eta espetxeko profesionalen artean sortutako sinergiak eta zentroan bertan askatasunik gabeko pertsonekin egindako lana funtsezko pieza dira presoak erabat gizarteratzen eta laneratzen direla bermatzeko.

Horri buruz egin dute gogoeta Sidalavako profesionalek: “Reincorpora programa, lan-aukera bat ez ezik, parte-hartzaileen bilakaera eta garapena ere bada, arlo pertsonalean eta profesionalean. Horrek guztiak aurrera egitera bultzatzen ditu, lan eta esfortzu handiz, euren ametsak egia bihurtzen direla ikusita”.

Gainera, enpresa laguntzaileek prozesu horretan guztian duten funtsezko zeregina nabarmendu nahi dute; izan ere, erantzukizun sozial korporatiboko politikak indartzeaz gain, gizarte berdinagoa eta zuzenagoa sustatzen dute, askatasunik gabeko pertsonek ere lekua izan dezaten. “Eskerrak eman nahi dizkiogu Sidalavari eta Incorpora y Reincorpora programari emandako laguntzarengatik eta konfiantzarengatik”.

Azkenik, erakundeko teknikariek etorkizunari begira dituzten asmoen adierazpen bat egin dute: “Enpresekin eta askatasunik gabeko pertsonekin elkarlanean jarraituko dugu, euren ametsak lortzeko”. Sidalava, Reincorpora programaren bitartez bere zigorraren azken fasean dauden pertsonen laneratzea eta gizarteratzea bultzatzen duten erakundeetako bat da. Reincorpora ekimenak 1.596 lan-kontratu bultzatu zituen iaz.